ملک میں چینی کتنے روپے کلو مل رہی ہے؟ وفاقی وزیر کا بڑا دعویٰ

ملک میں اس وقت چینی کا بحران اور قیمت 200 روپے کلو کے قریب ہے تاہم وفاقی وزیر نے اس حوالے سے بڑا دعویٰ کیا ہے۔

اے آر وائی نیوز کے مطابق وفاقی وزیر رانا تنویر حسین نے مرید کے میں میڈیا سے گفتگو کرتے ہوئے دعویٰ کیا ہے کہ چینی کا کوئی بحران یا ایشو نہیں۔ اس وقت چینی 173 روپے فی کلو میں فروخت ہو رہی ہے۔

وفاقی وزیر نے گدھے کے گوشت کے حوالے سے کہا کہ گوادر میں گدھوں کے گوشت کی اجازت ہے اور وہاں کا سلاٹر ہاؤس صاف ستھرا ہے۔

انہوں نے دیگر علاقوں (مریدکے) میں گدھے کے گوشت کی فروخت کے حوالے سے کہا کہ گدھے کا گوشت 8 ہزار روپے کلو ہے۔ اتنا مہنگا گوشت یہاں کون خریدے گا۔

وفاقی وزیر نے نے پاک امریکا تعلقات کے حوالے سے کہا کہ امریکا نے بھارت کو چھوڑ دیا اور دنیا میں ہمیں بہت بہتر ٹیرف ملا ہے۔ امریکا سے تاریخ میں پہلی بار قریبی تعلقات ہوئے ہیں اور ان تعلقات پر پاکستان کا کوئی دوست ملک ناراض نہیں۔

رانا تنویر نے پی ٹی آئی کو تنقید کا نشانہ بناتے ہوئے کہا کہ پی ٹی آئی یوم استحصال کے بعد اب جشن آزادی پر احتجاج کر رہی ہے۔ قوم تحریک انصاف کی حرکتیں دیکھ رہی ہے، کوئی انہیں سمجھائے۔