لاہور کی پہلی ٹورزم شاہراہ ’واہگہ ہیریٹیج کوریڈور‘ کی تعمیر

 وزیر اعلی پنجاب مریم نواز شریف کی ہدایت پر لاہور کی پہلی ٹورزم شاہراہ "واہگہ ہیریٹیج کوریڈور” کی تعمیر مکمل ہو نے کے قریب ہے۔

تفصیلات کے مطابق وزیر اعلیٰ پنجاب مریم نواز شریف نے اعلان کیا کہ لاہور کی پہلی خصوصی سیاحتی شاہراہ واہگہ ہیریٹیج کوریڈور پر کام تیز رفتاری سے جاری ہے۔

قائد اعظم انٹرچینج سے واہگہ بارڈر (زیرو لائن) تک تعمیراتی کام تیزی سے جاری ہے، 13 کلومیٹر طویل اس منصوبے پر اب تک 28 کروڑ 50 لاکھ روپے خرچ کیے جا چکے ہیں۔

لاکھوں شہریوں کو بہترین سفری سہولت فراہم کرنے کے لیے سڑک کو اطراف سے وسیع کیا جا رہا ہے، ٹورزم شاہراہ 68 فٹ چوڑی ہے جس کے دونوں اطراف 20 فٹ چوڑی سروس روڈز بھی تعمیر کی جا رہی ہیں۔

اس شاہراہ پر 22 کلو میٹر سے زائد طویل آر سی سی ڈرینیج سسٹم، 10 کلومیٹر آرائشی دیوار کی تعمیر کے علاوہ جدید سولر سٹریٹ لائٹس بھی نصب کی جارہی ہیں۔

جنوری میں شروع ہونے والا منصوبہ تیزی سے تکمیل کی جانب بڑھ رہا ہے، ٹریفک میں روانی کے ساتھ ساتھ منصوبے کی تکمیل سے واہگہ بارڈر پر پریڈ دیکھنے کے لیے آنے والے ملکی و غیر ملکی سیاحوں کو بھی عالمی معیار کی سفری سہولتیں فراہم ہوں گی۔

اس کے علاوہ بھارت سے آنے والے سکھ یاتریوں کو آمد پر  پاکستانی ثقافت، سیاحت اور خوب صورتی کے منفرد رنگ نظر آئیں گے، شہری سفر کے دوران قوی ہیروز کے پورٹریٹس اور روشنیوں سے مزین خوب صورت رنگ دیکھ سکیں گے، شاہراہ کی تعمیر اور نئے سیوریج نظام کی تنصیب سے اہل علاقہ کا دیرینہ مسئلہ بھی حل ہو جائے گا۔