نان فائلرز کے بینک سے رقوم نکلوانے پر ٹیکس کٹوتی میں اضافہ

فیڈرل بورڈ آف ریونیو (ایف بی آر) نے نئے مالی سال کے لیے انکم ٹیکس میں ترامیم کے رولز جاری کردیے۔

ایف بی آر کی دستاویز کے مطابق نان فائلرز کے بینک سے رقوم نکلوانے پر ٹیکس کٹوتی میں اضافہ کیا گیا ہے، ایکٹو ٹیکس پیئرز لسٹ میں شامل نہ ہونے والے افراد پر اضافی ٹیکس نافذ ہوگا۔

نان فائلرز کے یومیہ 50 ہزار سے زائد نکلوانے پر 0.8 فیصدٹیکس لاگو ہے، اس سے قبل یومیہ 50 ہزار سے زائد نکلوانے پر 0.6 فیصد ٹیکس عائد تھا، سینیٹ کی قائمہ کمیٹی خزانہ نے 50 ہزار کے بجائے 75 ہزار کیش نکلوانے پر 0.8 فیصدٹیکس کی تجویزدی تھی۔

دستاویز کے مطابق ہر بینکنگ کمپنی نان فائلر سے ایڈوانس ایڈجسٹ ایبل ٹیکس  کٹوتی کی مجاز ہوگی غیر منقولہ جائیدادکی خرید و فروخت یا منتقلی پر ایڈوانس ٹیکس کی شرح میں تبدیلی کی گئی ہے، پراپرٹی کے خریدار کو ریلیف دینے کے لیے ود ہولڈنگ ٹیکس میں 1.5 فیصد کمی کی گئی ہے۔

پراپرٹی کے فروخت کنندہ یا منتقل کرنے والے کے لیے ہر سلیب پر ٹیکس میں 1.5فیصد اضافہ کردیا گیا ہے، ٹیکس بڑھانے کا مقصد فروخت کنندہ کو جائیداد کی فروخت پرحاصل کیپٹل گین ایڈجسٹمنٹ ہے۔

علاوہ ازیں کسی نے 15 سال سے اپنے نام پر پراپرٹی رکھی تو اس پر 236 سی کا ود ہولڈنگ ٹیکس لاگو نہیں ہوگا، انکم ٹیکس گوشواروں میں 15 سالہ ملکیت ظاہر کرنا لازم ہوگا، مالک نے 15 سال میں مکان یا فلیٹ میں اپنی رہائش رکھی ہوئی ہو تو ود ہولڈنگ ٹیکس لاگو نہیں ہوگا۔