پاکستان نے بھارت میں ہاکی ایشیا کپ کھیلنے سے انکار کردیا، بھارتی میڈیا کا دعویٰ

بھارتی میڈیا نے دعویٰ کیا ہے کہ پاکستان نے بھارت میں ہاکی ایشیا کپ کھیلنے سے انکار کردیا ہے۔

بھارتی میڈیا کے مطابق پاکستان کی ٹیم ہاکی ایشیا کپ کھیلنے کے لیے بھارت نہیں جائے گی، ٹیم کو انتہا پسند بھارتیوں کی جانب سے دھمکیاں دی گئی تھیں۔

بنگلادیش کو پاکستان کی جگہ ایونٹ میں شامل کرلیا گیا ہے۔

ہاکی ایشیا کپ بھارتی ریاست بہار کے شہر راجگیر میں شیڈول ہے، ہاکی ایشیا کپ 29 اگست سے 7 ستمبر تک کھیلا جانا ہے۔

سیکریٹری پی ایچ ایف رانا مجاہد کا کہنا ہے کہ ہاکی فیڈریشن سے رابطے میں ہیں، ہمیں سیکیورٹی اور ویزے کی ضمانت دی جائے، ایشین ہاکی فیڈریشن نے خود کوئی فیصلہ کیا ہو تو علم نہیں۔

یہ ٹورنامنٹ ہاکی ورلڈ کپ کے کوالیفائنگ راؤنڈ کی بھی حیثیت رکھتا ہے۔

اگر پاکستان ٹیم نے ایشیا کپ سے دستبرداری کا اعلان کیا تو چار بار کی عالمی چیمپئن گرین شرٹس ایک بار پھر ورلڈ کپ میں شرکت سے محروم رہ سکتی ہے۔

واضح رہے کہ اس سے قبل پاکستان اور بھارت کے درمیان کشیدگی کے باعث ایشیا کپ کو بھارت سے کسی نیوٹرل مقام پر منتقل کرنے کا مطالبہ بھی سامنے آ چکا ہے۔