مالی سال 2025 میں کتنے روشن ڈیجیٹل اکاؤنٹس کھلوائے گئے؟ تفصیلات جاری

کراچی: اسٹیٹ بینک نے روشن ڈیجیٹل کھاتوں کے مالی سال 2025 کے اعدادوشمار جاری کردیے۔

اسٹیٹ بینک کے مطابق مالی سال 2025 میں ایک لاکھ19ہزار 185روشن ڈیجیٹل کھاتے کھلوائے گئے جس کے بعد روشن ڈیجیٹل کھاتوں کی مجموعی تعداد 8 لاکھ 31 ہزار 963 ہوگئی ہے۔

اسٹیٹ بینک کا بتانا ہے کہ مالی سال 2025 میں روشن ڈیجیٹل کھاتوں میں 2.308 ارب ڈالر جمع کرائے گئے اور ستمبر 2020 تا جون 2025 روشن ڈیجیٹل کھاتوں میں 10.563 ارب ڈالر جمع کرائے گئے۔

مرکزی بینک کے مطابق مالی سال 2025 میں روشن ڈیجیٹل کھاتوں سے 20 کروڑ ڈالر واپس نکلوائے گئے اور 57 مہینوں میں 1.811 ارب ڈالر واپس نکلوائے گئے۔

اسٹیٹ بینک کا بتانا ہے کہ مالی سال 2025 میں روشن ڈیجیتل کھاتوں سے 1.55 ارب ڈالر مقامی سطح پر خرچ کیے گئے اور 57 مہینوں میں 6.762 ارب ڈالر مقامی سطح پر خرچ کیے گئے۔

اسٹیٹ بینک کے مطابق مالی سال 2025 کے اختتام پر روشن ڈیجیٹل کھاتوں میں جمع واجب الادا ڈپازٹس1.99ارب ڈالر ہیں جب کہ مالی سال 2025 میں کھاتوں کے واجب الادا ڈپازٹس 55.8 کروڑ ڈالر بڑھے ہیں۔