گنڈاپور ارکان پنجاب اسمبلی کیلئے میدان میں آگئے، پارلیمانی پارٹی اجلاس کی اندرونی کہانی

پشاور: پی ٹی آئی کے گزشتہ روز ہونے والے پارلیمانی پارٹی کے اجلاس کی اندرونی کہانی سامنے آگئی۔

ذرائع کے مطابق گزشہ روز پارلیمانی پارٹی کے اجلاس میں بانی پی ٹی آئی کی رہائی کے لیے تحریک شروع کرنے پر غور ہوا جب کہ سیاسی اور امن و امان کی صورتحال سمیت دیگر امور زیرغور آئے۔

ذرائع کے مطابق وزیر اعلیٰ خیبر پختونخوا اعلی امین گنڈاپور نے پنجاب اسمبلی کے باہر پی ٹی آئی ارکین کے حق میں مظاہرہ کرنے کا فیصلہ کیا ہے جہاں وہ عمران خان کی رہائی سے متعلق تحریک کا اعلان بھی کرینگے۔

ذرائع کا بتانا ہے کہ پی ٹی آئی خیبر پختونخوا کے صدر جنید اکبر خان، عاطف خان، شہرام خان ترکئی اور شیرعلی ارباب اجلاس میں شریک نہیں ہوئے۔

دوسری جانب ترجمان وزیراعلیٰ کے پی فراز مغل کا کہنا ہے کہ وزیراعلیٰ آج اسلام آباد کے لیے روانہ ہوں گے اور پھرلاہورجائیں گے، وزیراعلیٰ کے ساتھ ارکان صوبائی اسمبلی اور تحصیل چیئرمین بھی جائیں گے۔

ترجمان نے بتایا کہ علی امین گنڈاپور پنجاب اسمبلی کے باہرپی ٹی آئی ارکان کےحق میں مظاہرہ کریں گے اور احتجاج میں بانی پی ٹی آئی کی رہائی کے لیے تحریک کا اعلان کریں گے، وزیراعلیٰ کے پی احتجاجی تحریک کو لیڈ کریں گے۔