فلسطینیوں کو ان کی سرزمین سے بے دخل کرنا سنگین جرم ہوگا،شامی عبوری صدر

شام نے کہا ہے کہ فلسطینیوں کو ان کی سرزمین سے بے دخل کرنا سنگین جرم ہوگا۔یہ بات شام کے عبوری صدر احمد الشرع نے امریکی صدر ڈونلڈ ٹرمپ کےغزہ کی پٹی کو خریدنے اور اس کی ملکیت حاصل کرنے کے ساتھ فلسطینیوں کو ملک بدر کرنے کے منصوبےپر رد عمل جاری کرتے ہوئے برطانوی پوڈ کاسٹ ’’دا ریسٹ از پولیٹیکس ‘‘کے ساتھ انٹرویو میں کہی۔

العربیہ کے مطابق انہوں نے کہا کہ فلسطینیوں کو ان کی سرزمین سے بے دخل کرنے کا منصوبہ ایک بڑا جرم ہے جو ایسا نہیں ہوگا۔ انہوں نے کہا کہ دنیا کی کوئی طاقت فلسطینیوں کو ان کے وطن سے نہیں نکال سکتی۔ انہوں نے مزید کہا کہ امریکی صدر کے لیے فلسطینیوں کو اپنی سرزمین چھوڑنے کی مہم کی قیادت کرنا دانشمندی نہیں ہے۔ واضح رہے کہ گزشتہ روز صدارتی طیارے میں سفر کرتے ہوئے امریکی صدر نے کہا تھا کہ وہ غزہ کو خریدنے اور اس کی ملکیت کے لئے پرعزم ہیں۔

انہوں نے کہا کہ وہ ساحلی پٹی کے کچھ حصے مشرق وسطیٰ کے دیگر ممالک کو تعمیر نو کی کوششوں میں مدد کے لئے دے سکتے ہیں، تاہم انہوں نے اس کی مزید وضاحت نہیں کی۔ دوسری جانب عرب ممالک سمیت عالمی سطح پر ان کے اس منصوبے کی سخت مخالفت کی گئی ہے۔