صدر مملکت آصف علی زرداری کا شمالی وزیرستان آپریشن میں سکیورٹی فورسز کی جانب سے 6 خوارج جہنم واصل کرنے پر انہیں خراج تحسین

صدر مملکت آصف علی زرداری نے شمالی وزیرستان آپریشن میں سکیورٹی فورسز کی جانب سے 6 خوارج جہنم واصل کرنے پر انہیں خراج تحسین پیش کرتے ہوئے کہا ہے کہ دہشت گردوں کے مکمل خاتمے تک سکیورٹی فورسز کی کاروائیاں جاری رہیں گی۔

جمعرات کو ایوانِ صدر کے پریس ونگ سے جاری بیان کے مطابق صدر مملکت نے انٹیلیجنس پر مبنی کارروائی کے دوران فتنہ الخوارج کے دہشت گردوں کا قلع قمع کرنے پر سکیورٹی فورسز کی بہادری کو سراہا۔ انہوں نے کارروائی کے دوران جامِ شہادت نوش کرنے والے میجر حمزہ اسرار اور سپاہی محمد نعیم کو خراجِ عقیدت پیش کیا اور ان کی بہادری و جذبہ حب الوطنی کو سراہا۔

صدر مملکت نے کارروائی کے دوران 2 جوانوں کی شہادت پر افسوس کا بھی اظہارِ کیا۔ انہوں نے شہداکے لواحقین کے ساتھ اظہار ہمدردی کیا اور ان کے لیے صبر جمیل کی دعا کی۔ صدر مملکت کا کہنا تھا کہ دہشت گرد عناصر کے خاتمے اور ملکی دفاع کےلئے ہمارا عزم غیر متزلزل رہے گا۔ انہوں نے فتنہ الخوارج کے مکمل خاتمے کے قومی عزم کا بھی اظہار کیا