وزیر اعلیٰ بلوچستان کی ہدایت پر تھیلیسیمیا اور ہیموفیلیا ج میں مبتلا بچوں کے علاج کے لئے مراکز قائم کرنے کا فیصلہ

وزیر اعلیٰ بلوچستان میر سرفراز بگٹی کی ہدایت پر بلوچستان میں تھیلیسیمیا اور ہیموفیلیا جیسے موذی امراض میں مبتلا بچوں کے علاج کے لئے سندس فاؤنڈیشن کے تعاون سے مراکز قائم کرنے کا فیصلہ کیا گیا ہے۔

اس ضمن میں سیکرٹری صحت بلوچستان مجیب الرحمن پانیزئی نے لاہور میں سندس فاؤنڈیشن کا دورہ کیا دورے کے دوران سیکرٹری صحت نے سندس فاؤنڈیشن کے مختلف شعبہ جات کا تفصیلی معائنہ کیا اور تھلیسیمیا اور ہیموفیلیا کے مریض بچوں سے ملاقات کی۔ فاؤنڈیشن کے ڈائریکٹر خالد عباس ڈار نے سیکرٹری صحت کا استقبال کرتے ہوئے تنظیم کی خدمات اور کامیابیوں پر تفصیلی بریفنگ دی میڈیکل ڈائریکٹر ڈاکٹر عدنان گیلانی نے آگاہ کیا کہ سندس فاؤنڈیشن ہر سال 7 ہزار سے زیادہ کو معیاری اور مفت علاج فراہم کر رہی ہے۔

ان کا کہنا تھا کہ تنظیم کا مقصد ہر بچے کو زندگی کا حق دینا ہے تاکہ کوئی بھی بچہ علاج کی سہولت سے محروم نہ رہے سیکرٹری صحت بلوچستان مجیب الرحمن پانیزئی نے سندس فاؤنڈیشن کی خدمات کو سراہتے ہوئے کہا کہ یہ تنظیم سماجی بھلائی کے لئے ایک شاندار مثال ہے۔ انہوں نے یقین دلایا کہ بلوچستان میں سندس فاؤنڈیشن کا مرکز قائم کرنے کے لئے حکومت بھرپور تعاون فراہم کرے گی۔

ان کا کہنا تھا کہ یہ مرکز بلوچستان کے مریض بچوں کے لئے ایک نعمت ثابت ہوگا دورے کے اختتام پر سیکرٹری صحت کو سندس فاؤنڈیشن کی جانب سے یادگاری شیلڈ پیش کی گئی۔ اس موقع پر فاؤنڈیشن کے دیگر عہدیداران اور ڈاکٹروں نے بھی شرکت کی بلوچستان میں سندس فاؤنڈیشن کے مرکز کا قیام صحت کے شعبے میں ایک اہم پیش رفت ہوگی وزیر اعلیٰ بلوچستان میر سرفراز بگٹی کی قیادت میں صوبائی حکومت صحت کے شعبے میں انقلابی اقدامات کے لئے پرعزم ہے تاکہ ہر بچے کو معیاری علاج کی سہولت میسر ہو۔