وزیر اعظم شہباز شریف ملکی مسائل و بحرانوں کے خاتمہ کیلئے سرگرم عمل ہیں ، رانا تنویر حسین

وفاقی وزیر صنعت و پیداوار ونیشنل فوڈ سکیورٹی رانا تنویر حسین نے شیخوپورہ کی تحصیل فیروز والا میں (ن) لیگ کی خاتون رکن پنجاب اسمبلی عطیہ افتخار بیگ کی رہائش گاہ پر ان سے ملاقات کی اور عطیہ افتخار بیگ کے والد اور مرزا افتخار بیگ سے انکے سسر کے انتقال پر اظہار تعزیت کیا اور مرحوم کی روح کے ایصال ثواب کیلئے فاتحہ خوانی و درجات کی بلندی اور لواحقین کیلئے صبر جمیل کی دعا کی، وفاقی وزیر رانا تنویر حسین نے کہا کہ عطیہ افتخار بیگ ایم پی اے کے والد کی وفات ان کیلئے بہت بڑا صدمہ ہے دکھ کی اس گھڑی میں ہم عطیہ افتخار بیگ اور دیگر سوگوار اہلخانہ کے غم میں برابر کے شریک ہیں، دعا ہے کہ اللہ تعالیٰ مرحوم کے درجات بلند فرمائے اور جنت الفردوس میں اعلیٰ مقام عطا فرمائے

انہوں نے کہا کہ (ن)لیگ ملک کو جلد بحرانوں سے نکال کر ترقی یافتہ بنائے گی،وزیر اعظم شہباز شریف وفاق کی سطح پر ملکی مسائل و بحرانوں کے خاتمہ کیلئے سرگرم عمل ہیں اور مریم نواز شریف کی دن رات کی کوشش سے پنجاب میں ترقی کے نئے دور کا آغاز ہو چکا ہے، وفاقی اور صوبائی حکومت محمد نواز شریف کی ہدایات پر عمل کرتے ہوئے ملک کو بحرانوں سے نکالنے کے لیے اپنا کردار بھرپور طریقے سے ادا کر رہی ہے، مہنگائی کو کنٹرول کیا جا رہا ہے، عوام سے جو وعدے کیے تھے انہیں پورا کیا جائے گا، اس وقت پاکستان مضبوط ہاتھوں میں ہے اور حکومت کی اولین ترجیح تومعاشی بحران کو حل کرنا ہے

حکومت ملک کو مشکلات سے نکالنے کے لیے پرعزم ہے اور عوامی خوشحالی کیلئے سنجیدگی سے کوشاں ہے اس وقت پاکستان کو جن چیلنجز کا سامنا ہے ان سے نمٹنے کے لیے بحثیت قوم ہمیں متحد ہونا ہوگا تمام اختلافات کو بالائے طاق رکھتے ہوئے ذاتی مفادات سے بالا تر ہو کراجتماعی سوچ کو فوقیت دینا ہوگی تاکہ اقوام عالم میں ہم بحیثیت پاکستانی مثالی قوم کے طورپر سامنے آسکیں۔