وفاقی وزیر رانا تنویر حسین کی زیر صدارت نیشنل سیڈ ڈویلپمنٹ اینڈ ریگولیٹری اتھارٹی کے بورڈ آف گورنرز کا اجلاس
وفاقی وزیر برائے قومی غذائی تحفظ و تحقیق رانا تنویر حسین کی زیر صدارت نیشنل سیڈ ڈویلپمنٹ اینڈ ریگولیٹری اتھارٹی (این ایس ڈی آر اے ) کے بورڈ آف گورنرز کا اجلاس منعقد ہوا۔ بدھ کو ہونے والے اجلاس کا مقصد بیج کے شعبہ میں بہتری کے لئے اتھارٹی کی مکمل فعالیت پر غور کرنا تھا۔ سیڈ ترمیمی ایکٹ 2024 کے تحت نیشنل سیڈ ڈویلپمنٹ اینڈ ریگولیٹری اتھارٹی کے قیام کا مقصد بیج کے شعبہ کے مسائل کو حل کرنے اور اس کی بہتری کے لئے کام کرنا ہے۔
اتھارٹی کے فرائض میں بیج سیکٹر کے لئے پالیسی تشکیل دینا، بیج کے معیار کی نگرانی اور وفاقی حکومت کو سفارشات فراہم کرنا شامل ہیں۔ وفاقی وزیر رانا تنویر حسین نے کہا کہ معیاری بیج زرعی پیداوار کو بڑھانے اور خوراک کی حفاظت کو یقینی بنانے میں اہم کردار ادا کرتے ہیں۔
انہوں نے اس بات پر زور دیا کہ جدید اور برآمدی معیار کے بیج خود کفالت کے حصول اور برآمدات کو فروغ دینے کے لئے ضروری ہیں۔ اجلاس میں اتھارٹی کی انتظامی ساخت، وژن اور سٹریٹجک اہداف پر تفصیلی گفتگو ہوئی۔ نیشنل سیڈ ڈویلپمنٹ اینڈ ریگولیٹری اتھارٹی کا وژن ایک مسابقتی بیج سیکٹر کو فروغ دینا ہے جو جدت، سرمایہ کاری اور جدید ٹیکنالوجی پر مبنی ہو۔ سٹریٹجک اہداف میں بیج کے معیار کو بہتر بنانا، درآمدات میں کمی، برآمدات میں اضافہ، اور کسانوں کی آمدنی میں بہتری شامل ہیں۔
اتھارٹی جراثیم کش بیج، جدید ٹیکنالوجی، سپلائی چین اور ریگولیٹری فریم ورک پر فوکس کرے گی۔ نیشنل سیڈ پالیسی کو بھی حتمی شکل دے دی گئی ہے، جس کے تحت اتھارٹی ہر سطح پر صوبوں کی مدد کرے گی۔ اجلاس کے اختتام پر وفاقی وزیر نے بیج سیکٹر کو مضبوط بنانے کے لئے وزارت کے عزم کا اعادہ کیا۔
