وزیر داخلہ محسن نقوی کا سیکٹر سی۔ 14 کا دورہ، ترقیاتی کام کا جائزہ لیا
وفاقی وزیرداخلہ محسن نقوی کی ہدایت پر سی۔ 14 سیکٹر میں ترقیاتی کاموں کا آغاز کردیا گیا ہے۔پلاٹس کی بکنگ 30 دسمبر تک جبکہ الاٹمنٹ کےلئے اوپن قرعہ اندازی 14 جنوری کو ہوگی۔وفاقی وزیر داخلہ محسن نقوی نے نئے تعمیر ہونے والے سیکٹر سی14 کا دورہ کیا اور ترقیاتی کاموں کا تفصیلی جائزہ لیا۔وزیرداخلہ محسن نقوی کا سی ڈی اے کو سیکٹر سی 14 کے ترقیاتی کام 15 فروری تک مکمل کرنے کا ٹاسک سونپ دیا۔
وزیر داخلہ محسن نقوی کا کہنا تھا کہ سیکٹر سی۔ 14 کو خصوصی طور پر اوورسیز پاکستانیوں اور مقامی رہائشیوں کیلئے پیش کیا جارہا ہے۔سیکٹر سی۔ 14 اسلام آباد کی پرائم لوکیشن پر واقع ہے جسے بہترین و پُرسکون طرز زندگی کیلئے ڈیزائن کیا گیا ہے۔ محسن نقوی نے کہا کہ اسلام آباد کی بڑھتی ہوئی آبادی کے پیش نظر سیکٹر ڈویلپمنٹ ورک میں مزید تیزی لائے جائے۔تمام زیر التوا سیکٹرز میں ترقیاتی کام مکمل کئے جائیں۔ انہوں نے ہدایت دی کہ ترقیاتی کاموں کی تکمیل کے بعد الاٹیز کو ان کے پلاٹس کا فورا ً قبضہ دیا جائے۔وفاقی وزیر داخلہ محسن نقوی نے سی ڈی اے حکام کو قبضہ مافیا کے خلاف بلاامتیاز کارروائی کرنے کا حکم بھی دیا۔
ان کا کہنا تھا کہ مارگلہ ہلز نیشنل پارک کی اراضی پر قبضہ مافیا کے خلاف کوئی رعایت نہ برتی جائے ۔ چیئرمین سی ڈی اے محمد علی رندھاوا نے وفاقی وزیر داخلہ کو ترقیاتی کاموں کے حوالے سے بریفنگ دیتے ہوئے بتایا کہ سیکٹر سی۔ 14 میں اوورسیز پاکستانیوں کو خصوصی ترجیح دی جائے گی۔ سیکٹر سی۔ 14 میں پلاٹس حاصل کرنے کیلئے 30 دسمبر 2024 تک بکنگ کروائی جاسکتی ہے۔
چیئرمین سی ڈی اے محمد علی رندھاوا نے وفاقی وزیر داخلہ کو سیکٹر آئی 11۔کے ترقیاتی کاموں کے حوالے سے بھی بریفنگ دی۔ انہوں نے بتایا کہ سیکٹر آئی 11۔ کے ترقیاتی کام آخری مراحل میں ہیں اور جلد ہی قبضہ الاٹیوں کے حوالے کر دیا جائے گا۔چیئرمین سی ڈی اے محمد علی رندھاوا سمیت سینئر متعلقہ حکام بھی وزیر داخلہ کے ہمراہ تھے۔
