آئی جی پنجاب کی دہشت گردوں کے خلاف بڑی کامیابی پر ڈی پی او میانوالی اور ان کی ٹیم کو شاباش

میانوالی تھانہ مکڑوال کے پہاڑی علاقہ ملاخیل میں 10سے 15دہشت گردوں کی موجودگی کی اطلاع موصول ہوئی جس پر ڈی پی او میانوالی اختر فاروق کی قیادت میں سی ٹی ڈی پولیس و ایلیٹ کی بھاری نفری نے آپریشن کیا۔ڈی پی او میانوالی اختر فاروق ، ڈی ایس پی سرکل عیسی خیل محمد اقبال، ایس ایچ او تھانہ مکڑوال، ایس ایچ او تھانہ کمرمشانی، پولیس اور ایلیٹ فورس ٹیمیں آپریشن میں شامل تھیں، پولیس اور خوارجی دہشت گردوں کے درمیان فائرنگ کا شدید تبادلہ ہوا۔پولیس کی جوابی فائرنگ سے 10خوارجی دہشت گرد ہلاک ہو گئے۔

ڈی پی او میانوالی، ڈی او سی ٹی ڈی، ڈی ایس پی سرکل عیسی خیل سمیت پولیس و ایلیٹ کے تمام افسران و جوان فائرنگ میں محفوظ رہے ہیں۔ آئی جی پنجاب ڈاکٹر عثمان انور کی دہشت گردوں کے خلاف بڑی کامیابی پر ڈی پی او میانوالی اور ان کی ٹیم کو شاباش دی۔انہوں نے کہا کہ پنجاب پولیس الرٹ ہے، دہشت گردوں کے ناپاک عزائم کو خاک میں ملا کر دم لیں گے اورمیانوالی پولیس امن دشمن عناصر کا اسی طرح جواں مردی سے مقابلہ کرتی رہے گی۔