پاکستان ادارہ شماریات کے زیراہتمام ڈیٹا فیسٹ 2024 کا کامیاب انعقاد،ملک کو درپیش مسائل کے حل کیلئے اہم موضوعات پر توجہ مرکوز کی گئی
پاکستان ادارہ شماریات نے منگل کو اسلام آباد میں ڈیٹا فیسٹ 2024 کامیابی سے اختتام پذیر ہو گیا۔ تقریب میں ماہرین، محققین اور ڈیٹا سے منسلک افراد کی ایک کثیر تعداد نے شرکت کی جو جدید معاشرے میں ڈیٹا کی تبدیلی کی طاقت کو تلاش کرنے کے لئے پرعزم ہیں۔ ڈیٹافیسٹ نے فیصلہ سازی، جدت اور معاشرتی ترقی میں اعداد و شمار کے اہم کردار کو اجاگر کرتے ہوئے تعاون اور معلومات کے تبادلے کو فروغ دیا، درپیش چیلنجوں سے نمٹنے اور پاکستان کی اقتصادی ترقی کو فروغ دینے کے لئے نئے حل کی ترغیب دی۔ ڈیٹا فیسٹ 2024 کے اہم سٹریٹجک شراکت دار ایف اے او، یو این ایچ سی آر، آئی ایل او، ورلڈ بینک، یو این ایف پی اے، یونیسف اور اے ڈی بی ہیں ۔ یہ تنظیمیں عالمی ترقی، صحت عامہ اور تعلیم میں وسیع مہارت رکھتی ہیں۔
پاکستان ادارہ شماریات کے ڈیٹا فیسٹ میں ملک کے اہم مسائل کو حل کرنے والے پانچ اہم موضوعات پر توجہ مرکوز کی گئی جس میں بامعنی تبدیلی کے لئے ڈیٹا سے فائدہ اٹھانے کی اہمیت کو اجاگر کیا گیا۔ قابل اعتماد اور شفاف اعداد و شمار پر زور دے کر ، ڈیٹا فیسٹ تھیمز نے باخبر فیصلہ سازی اور قومی ترقی کے لئے اپنی صلاحیت کا مظاہرہ کیا۔ قابل اعتماد اور شفاف اعداد و شمار باخبر فیصلہ سازی اور قومی ترقی کے لئے انتہائی اہمیت کے حامل ہیں ۔پاکستان ادارہ شماریات کا استعداد کار بڑھانےکے لئے مشترکہ کوششوں پر توجہ دینا پاکستان کی ترقی میں معاون ثابت ہو گا۔
پاکستان ادارہ شماریات نے ایونٹ کے پہلے دن 2 اور دوسرے روز 4 پینل مباحثوں کا انعقاد کیا جس میں مختلف تنظیموں کی نمائندگی کرنے والے ممتاز بین الاقوامی اور قومی ماہرین نے موضوعاتی شعبوں میں درپیش چیلنجز سے نمٹنے کے لئے اپنے نقطہ نظر کا تبادلہ کرنے کے لئے شرکت کی۔فیسٹیول میں جدید ترین ڈیٹا سلوشنزاور جدید ٹیکنالوجیز کی نمائش کے لیے سٹالز لگائے گئے۔ صوبائی ادارہ شماریات، نادرا، صوبائی آئی ٹی بورڈز، تعلیمی اداروں، اقوام متحدہ کی تنظیموں اور نجی انٹرپرائزز سمیت پاکستان کے معروف ڈیٹا پروڈیوسرز اور صارفین ڈیٹا کی تبدیلی کی طاقت کو ظاہر کرنے کے لئے جمع ہوئے۔
انہوں نے شفافیت، باخبر فیصلہ سازی، درستگی کو یقینی بنانے اور اہم قومی پالیسیوں کی حمایت کرنے والے نظاموں میں عوام کے اعتماد کے لئے ڈیٹا انضمام کی اہمیت پر زور دیا۔ اس مشترکہ کوشش نے موثر اعداد و شمار کے استعمال کے لئے صلاحیت سازی اور بین الشعبہ جاتی تعاون کو اہم قرار دیا۔ تقریب میں طالب علموں نے بھرپور شرکت کی، ڈیٹا سے منسلک نوجوان افراد نے اس تقریب میں رضاکارانہ طور پر حصہ لیا جوڈیٹا کی صلاحیت کو اجاگر کرنے کے لئے ان کے عزم کی نمائندگی کرتا ہے۔ان سرگرمیوں میں چھ پینل مباحثوں کے علاوہ اہم مقررین اور مختلف شعبوں سے تعلق رکھنے والے معروف ماہرین کی جانب سے ورکشاپ سٹیشنوں پر مختلف موضوعات پر تقریبا 60 پریزنٹیشنز بھی پیش کی گئیں۔
تعلیمی اداروں کے طلباء نے بھی ڈیٹا فیسٹیول میں حصہ لیا اور اپنے پراجیکٹس پیش کیے۔ یونیورسٹیوں کے درمیان پراجیکٹ مقابلہ بھی منعقد ہوا جس میں ایئر یونیورسٹی اسلام آباد نے پہلی، ایئر یونیورسٹی کامرہ نے دوسری اور ایریڈ ایگریکلچر یونیورسٹی راولپنڈی نے تیسری پوزیشن حاصل کی۔ممبر ایس ایس/آر ایم اور فوکل پرسن پاکستان ادارہ شماریات محمد سرور گوندل (ستارہ امتیاز) نے تقریب کے دوران حاصل ہونے والی معلومات کو جاری رکھنے کی اہمیت پر روشنی ڈالی۔ ڈیٹا فیسٹ 2024 میں دکھائے گئے باہمی تعاون کا جذبہ اس تقریب کو یادگار اور نتیجہ خیز بنانے میں ایک اہم جزو تھا جس سے ڈیٹا پر مبنی حل میں مستقبل کی جدت کی راہ ہموار ہوئی۔
انہوں نے تقریب کی کامیابی میں کردار ادا کرنے پر تمام کلیدی مقررین، پریزنٹر، پینلسٹ، منتظمین، شرکاء اور سٹیک ہولڈرز کا تہہ دل سے شکریہ ادا کیا۔ اختتامی کلمات میں پاکستان ادارہ شماریات کے چیف شماریات ڈاکٹر نعیم الظفر (ستارہ امتیاز)نے دو روزہ ایونٹ میں فعال شرکت اور تعاون پر تمام شرکاء کا تہہ دل سے شکریہ ادا کیا۔ اس تقریب نے ڈیٹا سائنس کے شعبے میں سیکھنے، تعاون اور جدت کے سفر کے لئے ماہرین اور ڈیٹا سے منسلک افراد کو کامیابی کے ساتھ اکٹھا کیا۔
چیف شماریات نے ڈیٹا فیسٹ کے سفیروں، رضاکاروں اور مختلف یونیورسٹیوں کے فیکلٹی ممبران کے جذبے اور لگن کو تسلیم کیا جنہوں نے اس ایونٹ میں فعال طور پر حصہ لیا۔ انہوں نےتقریب کے تمام شرکا کا شکریہ ادا کیا ، نتیجہ خیز تبادلہ خیال اور بامعنی رابطوں کو اجاگر کیا جو ڈیٹا پر مبنی ترقی کی حوصلہ افزائی کریں گے۔ انہوں نے نیپال، عمان، تھائی لینڈ اور آسٹریلیا سے پاکستان آنے والے تمام بین الاقوامی وفود کے ساتھ ساتھ ایس ای ایس آر آئی سی، آذربائیجان، ازبکستان اور ایران کے آن لائن ماہرین کا بھی شکریہ ادا کیا۔ چیف شماریات نے ایونٹ کے اہم نتائج سے آگاہ کیا اور امید ظاہر کی کہ یہ ایونٹ شواہد پر مبنی فیصلہ سازی کی راہ ہموار کرے گا۔
ڈیٹا فیسٹ 2024 پاکستان میں اعداد و شمار پر مبنی مستقبل کے لئے ایک اجتماعی وژن کی نمائندگی کرتا ہے۔ پاکستان ادارہ شماریات ڈیٹا پر مبنی حل کو آگے بڑھاتے ہوئےملک کو درپیش چیلنجز سے نمٹنےاور فلاح وبہبود کے لئے وقف ہے۔ تقریب نے سٹیک ہولڈرز کے مابین جاری تعاون کے لئے پلیٹ فارم فراہم کیااور تمام پاکستانیوں کے لئے زیادہ منصفانہ اور خوشحال مستقبل بنانے کے لئے ڈیٹا کی صلاحیت کو اجاگر کیا۔ آخر میں پاکستان ادارہ شماریات نے تمام شراکت داروں اور سٹیک ہولڈرز کا شکریہ ادا کیا جنہوں نے اس ایونٹ کو تمام سٹیک ہولڈرز کے لئے فائدہ مند اور نتیجہ خیز بنایا۔
