آئینی ترامیم میں کوئی متنازعہ نکتہ نہیں ہے، بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری نے کہا ہے کہ 26ویں آئینی ترامیم میں کوئی متنازعہ نکتہ نہیں ہے،مولانا فضل الرحمان کا جتنا شکریہ ادا کرو ں وہ کم ہے۔ اتوار کو یہاں پریس کانفرنس کرتے ہوئے بلاول بھٹو زرداری کا کہنا تھاکہ مولانا فضل الرحمن سے ٹیلی فونک رابطہ ہوا ہے، میں مولانا صاحب کا شکر گزار ہوں، جے یو آئی نے آئینی ترامیم کے مسودے پر بہت محنت کی ہے۔

مولانا فضل الرحمان نے پارٹی سینیٹرز کو اجلاس میں شرکت کی ہدایت کی ہے، جے یو آئی کے سینیٹرز پارلیمنٹ ہاؤس پہنچے ہیں۔انہوں نے کہا کہ پی ٹی آئی نے ہر فورم کو استعمال کیا لیکن ترمیم پر ایک لفظ نہیں دیا، پھر بھی درخواست کرتا ہوں پی ٹی آئی قومی مفاد میں اس ترمیم کا ساتھ دے، پی ٹی آئی ارکان نے کمیٹی میں اور ملاقاتوں میں اتفاق رائے کیا تھا، میری اور مولانا کی پریس کانفرنس کے بعد پی ٹی آئی ردعمل بہت افسوسناک ہے۔انہوں نے کہا کہ پی ٹی آئی ساتھ ہو یا نہیں، ہماری کوشش ہو گی آج ہر حال میں یہ کام پورا ہو۔