ملائیشن وزیراعظم کے دورہ پاکستان سے باہمی تجارت کو فروغ ملے گا،عاطف اکرام شیخ

ملائیشن وزیراعظم کے دورہ پاکستان سے باہمی تجارت کو فروغ ملے گا،وزیر اعظم پاکستان کی ملائیشیا کو حلال گوشت کی برآمد کو سالانہ 200 ملین ڈالر تک لے جانے کی تجویز قابل عمل ہے ان خیالات کا اظہار صدر فیڈریشن آف پاکستان چیمبرز آف کامرس اینڈ انڈسٹریز عاطف اکرام شیخ نے ملائیشیا کے وزیراعظم کے دورہ پاکستان کے حوالے سے اپنے ایک بیان میں کیا۔

انہوں نے کہا کہ فریقین کا دوطرفہ اقتصادی تعاون اور تجارتی عدم توازن کو دور کرنے پر اتفاق خوش آئند ہے،بڑھتی ہوئی توانائی کی ضروریات کیلئے اس شعبے میں مشترکہ منصوبوں کی گنجائش موجود ہے،ملائیشیا اور پاکستان کے درمیان زراعت کے میدان میں تعاون کے فروغ کی بہت زیادہ صلاحیت موجود ہے۔

عاطف اکرام شیخ نے کہا کہ حلال صنعت دونوں ممالک کے لیے ایک اہم شعبہ ہے جس میں تعاون کے وسیع مواقع موجود ہیں،سرٹیفیکیشن، سٹیڈرڈائزیشن اور نئی مارکیٹوں تک رسائی کے شعبوں میں تعاون کو فروغ دیا جا سکتا ہے۔انہوں نے کہا کہ دوطرفہ تعاون کے ذریعے نا صرف اپنی معیشتوں بلکہ پوری مسلم دنیا کو بھی فائدہ پہنچا سکتے ہیں۔