پاک فوج کے سربراہ جنرل سید عاصم منیر کا جنوبی وزیرستان کے ضلع وانا کا دورہ، دشمن قوتوں اور ان کے سہولت کاروں کے مذموم عزائم کو ناکام بنانے کے لیے پاک فوج کے غیر متزلزل عزم کا اعادہ
پاک فوج کے سربراہ جنرل سید عاصم منیر نے دشمن قوتوں اور ان کے سہولت کاروں کے مذموم عزائم کو ناکام بنانے کے لیے پاک فوج کے غیر متزلزل عزم کا اعادہ کیا ہے۔آئی ایس پی آر کے مطابق آرمی چیف نے جنوبی وزیرستان کے ضلع وانا کا دورہ کیا، جہاں انہیں سکیورٹی کی موجودہ صورتحال، انسداد دہشت گردی کے خلاف جاری آپریشنز اور ترقیاتی اقدامات کے بارے میں جامع بریفنگ دی گئی۔
افسران اور فوجیوں کے ساتھ بات چیت کے دوران آرمی چیف نے خطرات کا مقابلہ کرنے کے لیے پاک فوج کی اعلیٰ سطح کی تیاری اور غیر معمولی حوصلے کی تعریف کی۔ آرمی چیف نے سکیورٹی فورسز اور قانون نافذ کرنے والے اداروں کو خراج تحسین پیش کیا جنہوں نے ڈیوٹی کرتے ہوئے اپنی جانیں دیں۔
انہوں نے اس بات پر زور دیا کہ پاک فوج قانون نافذ کرنے والے اداروں بالخصوص کے پی کے پولیس کو ان کی استعداد کار بڑھانے کے لیے مستقل مدد اور تکنیکی مدد فراہم کرتی رہے گی۔ آرمی چیف نے جنوبی وزیرستان انٹیگریٹڈ ڈویلپمنٹ پلان کے تحت امن برقرار رکھنے اور مختلف منصوبوں کو آگے بڑھانے میں خیبرپختونخوا کے عوام کے کلیدی کردار کو سراہا۔
انہوں نے کے پی کے کے عوام کی خوشحالی اور ترقی کے لیے اپنے وسائل کو بروئے کار لانے کے لیے پاک فوج کے عزم پر زور دیا۔آرمی چیف نے دہشت گردی کے خلاف جنگ میں قبائلی عمائدین کی انمول حمایت اور پاک فوج کی ان کی غیر متزلزل حمایت پر شکریہ ادا کیا۔وزیرستان آمد پر آرمی چیف نے یادگار شہداء پر پھولوں کی چادر چڑھا کر شہداء کو خراج عقیدت پیش کیا۔ وانا میں کور کمانڈر پشاور نے آرمی چیف کا پرتپاک استقبال کیا۔
