اسلام آباد میں سرکاری سطح پر ٹین پن بائولنگ کورٹ بنایا جائے، ٹین پن باؤلنگ کھلاڑیوں کی وفاقی حکومت سے اپیل

ٹین پن باؤلنگ کے کھلاڑیوں نے وفاقی حکومت سے اپیل کی ہے کہ اسلام آباد میں سرکاری سطح پر ٹین پن بائولنگ کورٹ بنایا جائے تاکہ کھلاڑی بین الاقوامی سطح پر ٹین پن باؤلنگ کے مقابلوں میں شرکت کے لئے تربیت حاصل کر سکیں۔ ٹین پن باؤلنگ کے کھلاڑیوں محمد فہیم، شاہ رخ اور دنیال نے میڈیا کو بتایا کہ وفاقی دارالحکومت میں ٹین پن باؤلنگ کھیل کو سرکاری سطح پر کھیلنے کے لئے کوئی کورٹ یا کلب موجود نہیں ہے جس میں کھلاڑی بین الاقوامی سطح پر ٹین پن باؤلنگ کے مقابلوں میں شرکت کے لئے تربیت حاصل کرسکیں۔

اس سلسلہ میں جب پاکستان ٹین پن باؤلنگ فیڈریشن کے صدر اعجاز الرحمن سے رابطہ کیا گیا تو انہوں نے بتایا کہ واقع ہی پاکستان ٹین پن باؤلنگ فیڈریشن کے پاس ابھی تک کھلاڑیوں کے کھیلنے کے لئےکوئی اپنا بائولنگ کورٹ یا کلب موجود نہیں ہے۔ انہوں نے کہا کہ پاکستان ٹین پن باؤلنگ فیڈریشن نے وزارت بین الصوبائی رابطہ اور پاکستان سپورٹس بورڈ کو سرکاری کورٹ اور کلب بنانے کے لئے جگہ کی الاٹمنٹ کے لئے درخواست دی تھی جس پر پاکستان سپورٹس بورڈ کی ایگزیکٹو کمیٹی نے کئی برس قبل پاکستان سپورٹس کمپلیکس میں ٹین پن باؤلنگ کلب بنانے کے لئے جگہ الاٹ کرنے کی منظوری دے رکھی ہے اور یہ کلب پاکستان ٹین پن باؤلنگ فیڈریشن اپنی مدد آپ کے تحت تعمیر کروائے گی لیکن ابھی تک پاکستان ٹین پن باؤلنگ فیڈریشن کو پاکستان سپورٹس کمپلیکس میں جگہ کا قبضہ نہیں دیا گیا ہے۔

اعجاز الرحمن نے بھی وفاقی حکومت سے اپیل کی ہے کہ اسلام آباد میں سرکاری سطح پر ٹین پن بائولنگ کورٹ بنانے کے لئے پاکستان سپورٹس کمپلیکس میں جگہ کا قبضہ دلائیں تاکہ کھلاڑی بین الاقوامی سطح پر ٹین پن باؤلنگ کے مقابلوں میں شرکت کے لئے اپنی جدید اوراعلی معیار کی تربیت کر سکیں۔

انہوں نے مزید کہا کہ ٹین پن باؤلنگ کا کھیل بھی دنیا کے دوسرے کھیلوں کی طرح مقبول ترین کھیل ہے جو 137 ممالک میں کھیلا جا رہا ہے ،اگر پاکستان ٹین پن فیڈریشن کے پاس کھیلنے کے لئے اپنا کورٹ موجود ہو تو ورلڈ ٹین پن باؤلنگ چیمپئن شپ پاکستان میں منعقد ہو سکتی ہے اور اس چیمپئن شپ میں دنیا بھر سے 120 سے زائد مرد اور خواتین کھلاڑی حصہ لینے کے لئے پاکستان آ سکتے ہیں اور اس میگا ایونٹ سے دنیا بھر میں پاکستان کا کھیلوں کے حوالے سے ایک مثبت پیغام جائے گا کہ پاکستان کھیلوں کے حوالے سے ایک پرامن ملک ہے اور اس کی عوام غیرملکی کھلاڑیوں سے بے پناہ محبت کرنے والی قوم ہے۔