این سی ایچ آر کے زیر اہتمام گرلز فٹسال ٹورنامنٹ کے فائنل میچز (کل) ہوں گے

قومی کمیشن برائے انسانی حقوق (این سی ایچ آر) کے زیر اہتمام گرلز فٹسال ٹورنامنٹ کے فائنل میچوں کے لئے ٹیمیں پیر کو اسلام آباد پہنچ گئیں۔ این سی ایچ آر سے جاری پریس ریلیز کے مطابق (کل) 24جنوری کو پاکستان سپورٹس کمپلیکس میں ہونے والے فائنل میچوں میں کراچی، کوئٹہ اور چترال کی ٹیمیں شرکت کریں گی۔ پریکٹس میچوں کے علاوہ شلمبرجر پاکستان، ہیلتھ اینڈ سرویلنس ٹیم کی طرف سے کھلاڑیوں کی جسمانی تندرستی اور ذہنی صحت کے حوالے سے ایک سیشن بھی ہوگا ۔

این سی ایچ آر نے چار ماہ سے جاری اپنی مہم “امپاور ہر ” کے سلسلے میں ٹورنامنٹ کا انعقاد کیا ہے جس کا مقصد پاکستان میں کھیلوں میں لڑکیوں کی شرکت کو فروغ دینا ہے۔ “امپاور ہر” مہم کو پاکستان میں لڑکیوں اور خواتین کو کھیلوں خصوصاً فٹ بال میں حصہ لینے سے روکنے والے چیلنجوں سے نمٹنے کے لیے ڈیزائن کیا گیا ہے ۔ مختلف شعبوں میں نمایاں پیش رفت کے باوجودپاکستان میں لڑکیوں اور خواتین کو اب بھی کھیلوں میں حصہ لینے میں متعدد چیلنجز کا سامنا ہے، ان میں کھیلوں کا محدود انفراسٹرکچر، ناکافی فنڈنگ، صنفی تعصبات، تربیت و ترقی کے مواقع کی کمی اور کھیل کی تمام سطحوں پر خواتین کی نمائندگی کی کمی شامل ہیں۔

اس مہم کا مقصد کھیلوں کا ایسا ایکو سسٹم قائم کرنا ہے جو خواتین اور لڑکیوں کو فٹ بال میں فعال طور پر حصہ لینے، مقابلہ کرنے اور بہترین کارکردگی کا مظاہرہ کرنے کا اختیار دے ۔ یہ منصوبہ ابتدائی طور پر پاکستان کے چار شہروں کراچی، کوئٹہ، چترال اور اسلام آباد پر توجہ مرکوز کرے گا۔ان اہداف کو حاصل کرنے کے لیے این سی ایچ آر نے مقامی پارٹنرز سے تعاون کیا ہے ، ان پارٹنرز میں چترال میں کرشمہ علی فائونڈیشن، کوئٹہ میں ہزارہ یونائیٹڈ فٹبال کلب اور کراچی یونائیٹڈ فائونڈیشن کراچی شامل ہیں۔

مہم کے بارے میں بات کرتے ہوئے چیئرپرسن این سی ایچ آر رابعہ جویری آغا نے کہا کہ کھیلوں میں خواتین کو فروغ دینا صرف میدان میں گول کرنے سے کہیں زیادہ ہے، یہ ہمارے لئے رکاوٹوں کو ختم کرنے اور برابری کو فروغ دینے کا ذریعہ بھی ہے ۔ انہوں نے کہا کہ جب ہم کھیلوں میں خواتین کو بااختیار بناتے ہیں تو ہم معاشرے میں انصاف قائم کرنے اور بااختیار بننے جیسی اقدار میں اضافہ کرتے ہیں ۔