ایتھوپیا کے پاکستان میں سفارت خانے اور ٹریڈ ڈویلپمنٹ اتھارٹی آف پاکستان کا اگلے سال ادیس آبابا میں سنگل کنٹری نمائش کے انعقاد پر اتفاق

ایتھوپیا کے پاکستان میں سفارت خانے اور ٹریڈ ڈویلپمنٹ اتھارٹی آف پاکستان (ٹی ڈی اے پی) نے اگلے سال ادیس آبابا( ایتھوپیا )میں سنگل کنٹری نمائش کے انعقاد پر اتفاق کیا ہے۔ایتھوپیا کے سفارت خانہ سے جاری بیان کے مطابق اس بات پر اتفاق ایتھوپیا کے پاکستان میں سفیر ڈاکٹر جمال بیکر عبد اللہ اور ٹی ڈی اے پی کے چیف ایگزیکٹو زبیر موتی والا کے درمیان ملاقات میں ہوا۔

اس موقع پر ٹی ڈی اے پی کے سیکرٹری شہریار تاج، ٹی ڈی اے پی کے ڈائریکٹر عبدالکریم میمن اور کراچی میں ایتھوپیا کے اعزازی قونصل جنرل ابراہیم تواب بھی موجود تھے۔ سفیر ڈاکٹر جمال بیکر نے پاکستانی سرمایہ کاروں کو ایتھوپیا کی بڑھتی ہوئی معیشت میں مواقع تلاش کرنے کی دعوت دی۔ زبیر موتی والا نے زراعت، فارماسیوٹیکل اور تعمیراتی مواد جیسے شعبوں میں ملک کی طاقتوں پر زور دیتے ہوئے” لک افریقہ اور انگیج افریقہ“ پالیسی کیلئے پاکستان کے عزم کا اعادہ کیا۔ انہوں نے ایتھوپیا کو دوطرفہ تجارت کو مضبوط بنانے میں پاکستان کی طرف سے مکمل تعاون کا یقین دلایا۔

نمائش کا مقصد تجارتی تعلقات کو گہرا کرنا اور دونوں ممالک میں کاروبار کے لیے نئے مواقع کو کھولنا ہے۔