جوا اسکینڈل کی تحقیقات : ترکیے نے ایک ہزار سے زائد فٹبالرز کو معطل کر دیا
انقرہ: ترکیے نے جوا اسکینڈل کی تحقیقات کے سلسلے میں ایک ہزار سے زائد فٹبالرز کو معطل کر دیا۔
ترکش فٹبال فیڈریشن (TFF) کے مطابق پروفیشنل فٹبال بورڈ ڈسپلنری کمیٹی کی نشاندہی پر جوا اسکینڈل کی تحقیقات کے سلسلے میں 1024 فٹبالرز کو معطل کیا گیاہے۔
معطل کیے گئے27 فٹبالرزکا تعلق ٹاپ ڈویژن کلبز سے ہے۔
ترکش فٹبال کے تیسرے اور چوتھے ڈویژن کے میچز 2 ہفتوں کے لیے معطل کر دیے گئے ہیں، تاہم دوسری ڈویژن کے میچز جاری رہیں گے۔
واضح رہے کہ گزشتہ چند ہفتوں سے ترک فٹبال کو ہلا کر رکھ دینے والے اسکینڈل میں پہلے ریفریز اور پھر کھلاڑیوں کی جانب سے جوا کھیلنے کے الزامات کی تحقیقات جاری ہیں۔
رپورٹس کے مطابق یہ اسکینڈل پچھلے مہینے اس وقت منظرعام پر آیا جب ترکش فٹبال فیڈریشن نے 149 ریفریز اور اسسٹنٹ ریفریز کو معطل کر دیا تھا۔
ترکش فٹبال فیڈریشن کے مطابق ایک سرکاری ادارے نے انکشاف کیا تھا کہ ملک کے 571 ریفریز میں سے 371 کے جوئے کی کمپنیوں میں اکاؤنٹس موجود ہیں، جن میں سے 152 ریفریز نے فٹبال میچز پر شرطیں لگائیں جن میں 7 اعلیٰ سطح کے ریفریز اور 15 اسسٹنٹ ریفری شامل ہیں۔
گزشتہ ہفتے 21 افراد کے وارنٹ گرفتاری بھی جاری کیے گئے ، جن میں 17 ریفریز اور ایک سپر لیگ کلب کے صدر بھی شامل ہیں۔
مقامی میڈیا کے مطابق، پیر کو 8 افراد بشمول ایک کلب چیئرمین کو گرفتار بھی کیا گیا۔
ترکش فٹبال فیڈریشن کے صدر ابراہیم حاجی عثمان نے فٹبال میں جاری بدعنوانی کو اخلاقی بحران قرار دیتے ہوئے کہا کہ کھیل کو ہر قسم کی گندگی سے پاک کیا جائے گا۔
